Նոր Նորքը մայրաքաղաք Երևանի երիտասարդ վարչական շրջաններից է, որի կենսապատումը սկսվել է դեռևս 1960-ական թվականների սկզբից։ Երևանի կառուցապատումն ընդլայնելու նպատակով կառավարությունում ընթացող երկար քննարկումների ժամանակ ընդունվեց երջանկահիշատակ Բադալ Մուրադյանի առաջարկությունը` բարձրանալ դեպի հյուսիս-արևելք։ Բարդ ու բազում դժվարություններով լեցուն խնդիր էր, սակայն, չնայած խոչընդոտներին, Նոր Նորքը կյանքի վկայագիր ստացավ։ Կառուցվեցին սարերով ու ձորերով իրարից բաժանվող շենքեր, դպրոցներ ու մանկապարտեզներ, բժշկական հաստատություններ, գործարաններ ու ձեռնարկություններ, հաղորդակցության ուղիներ և հետո՝ բնակելի զանգվածներ։
1972 թվականին ծնվեց մայրաքաղաք Երևանի թվով 7-րդ խորհրդային շրջանը, որն ընդգրկում է Նոր Նորքի առաջինից իններորդ զանգվածները, Ջրվեժի "Բանավան" ու "Մայակ" թաղամասերը։ Վարչական շրջանը սահմանակից է Քանաքեռ-Զեյթուն, Ավան, Նորք-Մարաշ, Էրեբունի, կենտրոն համայնքներին, և Կոտայքի մարզին։
Այսօր Նոր Նորքը զբաղեցնում է 1.451 հեկտար տարածք: Վարչական շրջանն ունի շուրջ 680 բազմաբնակարան շենք, հանրակրթական 21 և 1 գիշերօթիկ դպրոց, Անանիա Շիրակացու անվան ճեմարան, 23 ՆՈՒՀ, 2 միջին մասնագիտական քոլեջ, 1 պրոֆտեխուսումնարան, կենտրոնական գրադարան, մշակույթի կենտրոն, 1 երաժշտական և մեկ արվեստի դպրոց, Վ Սարգսյանի անվան ռազմական ինստիտուտ, 2 մարզադպրոց, մարզա-առողջարարական կենտրոն, մանկապատանեկան տեխնիկական ստեղծագործական կենտրոն, "Սբ. Գրիգոր Լուսավորիչ" բժշկական կենտրոն և 6 համաբուժարան։ Նոր Նորքում են գործում "Ջրաշխարհը", "Եվրոթերմը", "Գապեքսը", "Գաջ" ԲԲԸ, "Բարի Սամարացի" ընկերությունը, "Ավտոմատիկան", "Վանը", "Կոննեկտը", "ՆիիԷլեկտրամաշը", "Պրոգրեսը",
"Ոսկան Երևանցի" տպագրատունը, "Էլտե Պիրկալը", "Գարիի Գրուպը", "Սելենան",
"Շաբեր" ընկերությունը, "ՍՊՍ Սիգարոնը", "Օրբիտան", "Տիտանը" և այլ գործարաններ ու ձեռնարկություններ:
Մայրաքաղաքի երիտասարդ զավակի սրտում է վեր հառնում ամերիկահայ բարերարների օժանդակությամբ կառուցված Աստծո Տունը՝ Սուրբ Սարգիս եկեղեցին՝ տեղակայված Երևանի ամենաբարձր վայրում: Աշխույժ ընթացքով է առաջ շարժվում նաև սոցիալ-տնտեսական, գիտակրթական, հոգևոր-մշակութային և ուսումնամարզական կյանքը։ Օրեցօր բարեկարգվում և արդիական շունչ է ստանում Նոր Նորքը` իր կանաչազարդ պուրակներով, գեղատեսիլ կառույցներով և գալիքի կերտմանը միտված ազգանպաստ գործունեությամբ:Նոր Նորքն ունի նաև իր ինտերնետային ալիքը` NORNORQTV, որտեղ տեղադրված են վարչական շրջանին վերաբերող տարբեր տեսանյութեր:
Ստեղծագործական խումբ Creative Group
Արթուր Դանիելյան Arthur Danielyan
Նարինե Ադամյան Narine Adamyan
TVADSTUDIO ©
