Միջազգային գիտաժողով Երևանի տնտեսաիրավագիտական համալսարանում

 21-րդ դարը հասարակություն թափանցեց ոչ միայն գիտատեխնիկական, հասարակական ու տնտեսական կյանքի աննախադեպ նվաճումներով, այլև աշխատաշուկայի նոր պահանջներով, որոնք կառուցվածքային ու բովանդակային լուրջ փոփոխություններ էին ենթադրում հատկապես կրթական համակարգում:

Այս հարցերի վերլուծության ու առկա խնդիրների լուծման ուղիների մշակման առումով ուշագրավ էր Ավետիք Մկրտչյանի անվան տնտեսաիրավագիտական համալսարանի նախաձեռնությամբ կազմակերպված միջազգային գիտական 2-րդ կոնֆերանսը, որտեղ ներկայացվող հոդվածները լույս տեսան առանձին ժողովածուի տեսքով: 
Միջազգային գիտական կոնֆերանսը մեկնարկեց մայիսի 15-ին: Բացման արարողությանը ներկա էին կրթության և գիտության ոլորտի առաջավոր ներկայացուցիչներ` ինչպես Հայաստանից, այնպես էլ արտասահմանյան տարբեր երկրներից:

Ավանդույթի համաձայն հյուրերը ծաղկեպսակ դրեցին և հարգանքի տուրք մատուցեցին բուհի հիմնադիր, մեծ հայրենասեր ու գիտակրթական վաստակաշատ գործիչ Ավետիք Մկրտչյանի հուշարձանին:

Գլոբալիզացիան թելադրում է եվրոպական միասնական կրթական տարածքի ստեղծում, որտեղ շրջանավարտին ներկայացվող պահանջները կլինեն հստակ սահմանագծված, իսկ կրթական չափորոշիչները միևնույն հարթությունում:

Իսկ ինչ ընթացք ունեն Բոլոնյան գործընթացն ու կրթական բարեփոխումները անցումային տնտեսություն ունեցող երկրներում, ինչ խնդիրներ ու չլուծված հարցեր են ծառանում այդ ճանապարհին, և որոնք են դրանք հաղթահարելու ուղիները:

Ավետիք Մկրտչյանի անվան տնտեսաիրավագիտական համալսարանում կազմակերպված միջազգային գիտական կոնֆերանսը միտված էր համախմբելու անցումային տնտեսություն ունեցող երկրների գիտական ներուժը, փոխանակվելու ոլորտում առկա առաջավոր փորձով և համատեղ մշակելու մեթոդներ ու եղանակներ կրթական բարեփոխումները անցումային տնտեսություն ունեցող երկրներում սահուն իրականացնելու ուղղությամբ:

Երևանի տնտեսաիրավագիտական համալսարանի կազմակերպած գիտաժողովը նպատակ ուներ վեր հանել ԱՊՀ երկրների կրթական համակարգի խնդիրները ոչ միայն բուհերում, այլև նախնական, միջին մասնագիտական և հանրակրթական ուսումնական հաստատություններում: 

Գիտաժողովում հնչած զեկուցումները, քննարկումները և առաջարկությունները արդյունավետ դերակատարում կունենան Եվրոպական բարձրագույն կրթական տարածքին բարեհաջող ինտեգրվելու մեխանիզմներ մշակելու տեսանկյունից: Ավետիք Մկրտչյանի անվան տնտեսաիրավագիտական համալսարանը գիտակրթական արդյունավետ գործունեությամբ շարունակում է կերտել իր բեղմնավոր աշխատանքային կենսագրությունը՝ աշխատաշուկան համալրելով որակյալ, անհրաժեշտ գիտելիքներով ու կարողություններով օժտված շրջանավարտներով: