Գեղարվեստական մարմնամարզություն / Աննա Այվազյան /

Հոգու և մարմնի ներդաշնակություն, արվեստի հասնող շարժումների գեղեցիկ հարմոնիա:

Ահա այսպես կարող ենք բնորոշել գեղարվեստական մարմնամարզությունը, սպորտաձև, որը սկիզբ առավ 1940-ական թվականներից և 80-ականներին ընդգրկվեց օլիմպիական մարզաձևերի կազմում:

Երիտասարդ սպորտաձևը ոչ միայն սիրվեց այլև համաշխարհային հռչակ և ճանաչում գտավ աշխարհի տարբեր անկյուններում:

Հայաստանում այս ուշագրավ և հետաքրքիր ոլորտի առաջամարտիկներից է գեղարվեստական մարմնամարզության մարզիչ, հանրապետական և միջազգային կարգի մրցավար, սպորտի վարպետ Աննա Այվազյանը:
Շուրջ մեկ ու կես տասնամյակ հաջողակ մարզուհու և փորձառու մարզչի նպատակասլաց աշխատանքի արդյունքում բնագավառում նկատելի դրական տեղաշարժ է գրանցվում:
Իսկ ի՞նչ է իրենից ներկայացնում գեղարվեստական մարմնամարզությունը, ինչ առավելություններ ունի և զարգացման ինչպիսի հեռանկարներ են առկա այս ասպարեզում:  

 ՏԵՍԱՖԻԼՄ

Այս մարզաձևով զբաղվում են միայն կանայք։ Մրցությունների ժամանակ մարզուհիները երաժշտության ուղեկցությամբ կատարում են մարմնամարզական և պարային վարժություններ, կա՛մ առանց մարզագործիքների, կա՛մ մարզագործիքներով (ժապավեն, գնդակ, գուրզ, օղակ, ցատկապարան)։  

Գեղարվեստական մարմնամարզությունը գեղեցիկ սպորտաձև լինելուց բացի նաև բարերար ազդեցություն ունի մարմնի ճկունության ապահովման և կազմվածքի ճիշտ ձևավորման վրա. այն հաղորդում է դրական էներգիա և լիարժեքության զգացում:

Գեղարվեստական մարմնամարզությունը ոչ միայն ճկուն և սլացիկ է դարձնում աղջիկներին, այլև ինքնաբացահայտվելու հրաշալի հնարավորություն դառնում: Շատ մարզուհիներ են հետագայում որդեգրում պրոֆեսիոնալ սպորտի ճանապարհը՝ դրսևորելով իրենց մարզական բարձր ունակությունները: Գեղարվեստական մարմնամարզության մարզիչ Աննա Այվազյանի կյանքում սպորտաձևը ևս կյանքի ուղեկից դարձավ: Այսօր նրա պատրաստած կադրերը հաջող դրսևորվում են ոչ միայն հանրապետական այլև միջազգային մրցասպարեզներում՝ զբաղեցնելով պատվավոր հորիզոնականներ:

Մեր հանդիպման առիթը հերթական հաղթանակով էր պայմանավորված, այն էլ՝ միջազգային մրցույթում, որտեղ մեր հայ մարզուհիները մրցեցին գեղարվեստական մարմնամարզության ոլորտում առաջատար այնպիսի երկրների հետ, ինչպիսիք Ռուսաստանն ու Ուկրաինան են: Արդյունքները ոգևորող էին՝ հաղթանակի բերկրանքը՝ աննկարագրելի հուզիչ մինչ օրս:

Անխոս, հաղթանակը ազգինն է, բայց նախ և առաջ մարզուհիների և մարզիչ Աննա Այվազյանի համատեղ նվաճումը. թերևս աշխատանքի լավագույն գնահատականն էլ հենց այս փաստն է, որն արդեն իսկ խոսուն գրավականն է իրականացվող նպատակասլաց և հետևողական աշխատանքի:

Կենտրոն վարչական շրջանի համալիր մարզադպրոցում գեղարվեստական մարմնամարզության մարզիչ Աննա Այվազյանի փորձառության, մասնագիտության հանդեպ անշահախնդիր նվիրումի արդյունքում են մարզուհիները սիրում և գնահատում մարմնամարզության այս տեսակը՝ դրսևորում իրենց թաքնված կարողություններն ու նվաճում հաղթանակի փառքը:

Այստեղ միահյուսվում են ուժն ու նրբագեղությունը, ճկունությունն ու գեղեցկությունը՝ ծնունդ տալով արվեստի հրաշագեղ ստեղծագործության:

Տեղեկությունների համար զանգահարել 091 494 496 

 

Ստեղծագործական խումբ Creative Group
Արթուր Դանիելյան Arthur Danielyan
Հեղինե Կարապետյան Heghine Karapetyan
Նարինե Ադամյան Narine Adamyan
TVADSTUDIO©