ԳԻՆԵՎԱՆ ԳԻՆՈՒ ԳՈՐԾԱՐԱՆ

 TVADSTUDIO©

Գոգոլի անվան թիվ 35 դպրոց "Բարի երթ դեպի իմացության անսահման աշխարհ" 2012թ.

"Բարի երթ դեպի իմացության անսահման աշխարհ"

Գիտելիքը մեր արժեքային համակարգի հարատևության նախապայմանն է: Ուստի՝ յուրաքանչյուրիս պարտքն է գնահատել այն, ըստ արժանվույն պահպանել և փոխանցել գալիք սերունդներին:

Գիտակրթական բազմադարյա արժեքներ ունեցող հայերիս կյանքում գիտելիքի օրը առանձնահատուկ հնչեղություն ունի, քանի որ կրթության ոլորտում բացում է մտավոր նվաճումների նոր արշալույս:

Այս տոնական միջոցառումները գեղեցիկ հնչեղություն ունեին Գոգոլի անվան թիվ 35 հիմնական դպրոցում, որտեղ ավանդաբար գիտության օրը վերածվում է լիարժեք տոնակատարության:

        ՏԵՍԱՖԻԼՄ

Իրենց մանկության հուշաշխարհում սաները սրտի թրթիռով ու երազանքներով են մտաբերելու առաջին անգամ դպրոց մուտք գործելու հուզումնալից պահերը: Թեև ժամանակը շատ բան մոռացության կտա, բայց առաջին զանգի խորհրդավոր ղողանջները, առաջին ուսուցչուհու մայրական ջերմ ժպիտն ու իմացության աշխարհ առաջին քայլերը միշտ էլ կմանան որպես հիշողության գանձարանի թանկարժեք գոհարներ: 
Եվ ամեն սեպտեմբերի մեկյան գալուստին, անախ սեռից ու տարիքից, հոգեհույզ մի զգացողությամբ կվերապրես մանկության այն սրտի թրթիռն ու անպատմելի զգացողությունը, որը ծիածանաթև հրաշքով կպարուրի հոգիդ՝ ստիպելով նորովի գնահատել ու արժորել կյանքը:

Գոգոլի անվան թիվ 35 դպրոցում գիտելիքի օրվա առթիվ կազմակերպված միջոցառմանը մասնակցում էր կրթօջախի ամենակրտսեր ու ավագ սերունդը: Ավարտական դասարանի աշակերտները բարի գալուստ մաղթեցին առաջին անգամ դպրոց մուտք գործող փոքրիկներին՝ նշելով, որ նրանք ոտք են դնում մի կրթօջախ, որը բարու և գեղեցիկի, իմացության ու կյանքի ոսկե դասեր է տալու նրանց, արահետ է հարթելու գիտության անեզր աշխարհում:

Թիվ 35 դպրոցն այս տարի իր հյուրընկալ հարկի ներքո տոնական գեղեցիկ արարողությամբ բարի մուտք ազդարարեց 5 առաջին դասարանի: Նշենք, որ Գոգոլի անվան դպրոցում գործում են նաև ռուսական ուղղվածությամբ դասարաններ, այս առումով կրթօջախը Նուբարաշեն և Էրեբունի վարչական շրջաններում միակն է, հետևաբար` մեծ պատասխանատվությամբ է ձեռնամուխ լինում լեզվի բարձր դրվածքի ապահովմանը դպրոցում:

Գիտելիքի և դպրության օրվա կապակցությամբ Գոգոլի անվան թիվ 35 դպրոցում կազմակերպված միջոցառմանը ներկա էին կրթօջախի բարեկամները, ինչպես նաև բարձրաստիճան հյուրեր տարբեր ոլորտներից:

Աշակերտներին, մանկավարժներին և ծնողներին ուսումնական տարվա մեկնարկի առթիվ շնորհավորեց տնօրեն Ասատուր Սարյանը: «Ավանդաբար գրապաշտ մեր ազգի կյանքում կրթությունը շարունակում է պաշտամունք մնալ,- ընդգծեց տնօրենը,-ուստի մեզանից յուրաքանչյուրը պատասխանատվության բարձր զգացումով պետք է նվիրաբերվի կրթական գործին, որ հայոց մտավոր ներուժը անկոտրում լինի:

Դպրության օրվա առթիվ շնորհավորական խոսքով ելույթ ունեցավ նաև ՀՀ-ում Ռուսհամագործակցության ներկայացուցիչ Էվելինա Բայաթյանը:

70-ամյակը բոլորած հաստատությունը շատերին է կյանքի մեծ համալսարան ճանապարհել, կրթության այս մշակի ավանդած արժեքներով են այսօր բազմաթիվ գործիչներ իրենց մնայուն տեղը գտել երկրի տնտեսության, մշակույթի, գիտության և հասարակական կյանքի ամենատարբեր ոլորտներում: 

Ուշագրավ են հաջողությունները նաև ռազմագիտության դասընթացի ուսուցման բնագավառում. այսօրվա աշակերտը վաղվա զիվորն է՝ երկիրը պահողն ու պաշտպանողը: Առարկայի լավ դրվածքը բազմիցս է գնահատվել տարբեր մրցույթներում և օլիմպիադաներում, անգամ ոլորտի բարձրաստիճան ներկայացուցիչների կողմից:

Կրթօջախի նկատելի հաջողությունները անցյալի և ներկայի կրթական լավագույն ավանդույթների ներդաշնակման, մանկավարժական փորձառու անձնակազմի անընդմեջ կատարելագործման և իհարկե, այս ամենը հմուտ կերպով ղեկավարող տնօրենի համալիր աշխատանքի արդյունք է:

Եվս մի սեպտեմբերի 1, ուսումնառության շրջանի նոր սկիզբ, որն ամեն անգամ նոր հույսով ու հավատով է լցնում յուրաքանչյուրի հոգին: Երեխաներն իրենց ծնողների ուղեկցությամբ քայլում են դպրոցի  ճանապարհով, առաջին զանգի, առաջին դասի ու առաջին ուսուցչի քաղցր պատրանքով: Գնում են նրանք, որ առաջին այբուբենով մեսրոպյան հրաշքը շարունակեն, որ հայոց աշխարհը հավերժ ապրի:  
Բարի երթ դեպի իմացության անսահման աշխարհ:

Ստեղծագործական խումբ Creative Group
Արթուր Դանիելյան Arthur Danielyan
Հեղինե Կարապետյան Heghine Karapetyan
Նարինե Ադամյան Narine Adamyan
TVADSTUDIO©

ԳՈԳՈԼ 200-ԱՄՅԱԿ

Համաշխարհային գրականության մեծերի ավանդած դասերի սերտումը նոր սերնդի գաղափարական առջընթացի կարևորագույն հիմնասյուներից է, քանզի համամարդկային արժեքների խտացմամբ է հղկվում և  ձևավորվում ազգի միտքն ու հոգեկերտվածը:  

Այս գաղափարի խորին ընկալմամբ է իր աշխատանքային ուղին ձևավորում Ն. Գոգոլի անվան թիվ 35 դպրոցը՝  դեռևս աշակերտական նստարանից աշակերտների մեջ ձևավորելով վեհագույն արժեքների, որոնց լուսավոր ցոլքերով է մարդկությունը թևակոխել զարգացման և առաջընթացի նոր ուղի:

Համաշխարհային գրականության վիթխարի գանձարանում վեր է հառնում համայն մարդկությանը հայտնի մի անուն, որը ռուս մեծ գրող Տուրգենևի բնորոշմամբ ձևավորեց մի ողջ դարաշրջան՝ գրականության պատմության մեջ դառնալով մեկը այն փառքերից, որով իրավամբ պարծենում են. խոսքը վերաբերում է բոլոր ժողովուրների և բոլոր ժամանակների մեծագույն գրողների շարքին դասվող Նիկոլայ Վասիլևիչ Գոգոլին: Մարդ, ով իր անկրկնելի և հիասքանչ ստեղծագործություններով նոր դարագլուխ բացեց համաշխարհային գրականության մեջ՝ հիմք դնելով քննադատական ռեալիզմին: Մեծ գրողի անունը կրող թիվ 35 դպրոցը պատվախնդրության վեհ զգացումով է իրականացնում իր առաքելությունը կրթության բնագավառում՝ երեխաների մեջ արմատավորելով լուսավոր գործչի ավանդած արժեքները:

Թերևս այդ նպատակին էր միտված Ն. Գոգոլի 200-ամյա հոբելյանի առթիվ կազմակերպված հիշատակման ցերեկույթը, որին կրթօջախը պատրաստվել էր համընդհանուր ոգևորությամբ: Դպրոցի բակում տեղադրված Գոգոլի կիսանդրին ծածկվել էր ծաղիկներով: Ոգեղեն կերպարը ամփոփվելով քարեղեն հայացքում՝  կարծես պատգամում էր դարերի լուսավոր պատգամը, որը մեր գրականության մեջ թումանյանական բնորոշմամբ է արտացոլվել.

Գործն է անմահ, լա՛վ իմացեք,
Որ խոսվում է դարեդար,
Երնե՜կ նըրան, որ իր գործով
Կապրի անվերջ, անդադար։

Այո, իր կատարած գործով անմահացավ Գոգոլի լուսավոր անունը՝ ժամանակների մեջ դառնալով սուր գրիչ, ով իր մնայուն ստեղծագործություններով պատկերեց իրականությունը՝ պատռելով բարոյականության կեղծ քողը:

Հիշատակման ցերեկույթի ընթացքում թիվ 35 դպրոցի աշակերտները բեմականացմամբ պատկերեցին ժամանակի շունչը՝ վերականգնելով պատմական կոլորիտն ու տարբեր հասարակարգերի բարքն ու վարքը: Կենցաղային տարաբնույթ դրվագներով սաները իրական երանգ հաղորդեցին գոգոլյան ժամանակաշրջանի կերպարներին՝ անցյալի բովից վերհանելով ռուսական կյանքի մութ ու մռայլ կողմերը: Ռուս հանճարեղ գրողը դառնալով պատմական դարաշրջանի գեղարվեստական արտահայտիչը՝ ռեալիստական արվեստով ներկայացրեց օբեկտիվ իրականությունը՝ բարձր մարդասիրության դիրքերից բացահայտելով սոցիալական խոր հակասությունները:

Գոգոլի անվան թիվ 35 դպրոցի աշակերտները բեմականացրել էին մեծ գրողի երգիծական հանճարի արգասիքը հանդիսացող «Ռևիզոր» կատակերգությունը, որի գործողությունները տեղափոխվել էին դպրոցական միջավայր: Վերստին կերտելով հանճարեղ գործչի ստեղծած կերպարները՝ սաները վարպետորեն ստեղծեցին հակասություններով լի միջավայրը՝ իր խավային բազմազանությամբ և սուր երգիծանքով:

Ն. Գոգոլի 200-ամյակին նվիրված միջոցառմանը ներկա էին բազմաթիվ հյուրեր, այդ թվում Էրեբունի համայնքի կրթության, մշակույթի առողջապահության և սպորտի բաժնի պետ Իննա Դավթյանը, ՌԴ դեսպանի օգնական Անատոլի Նիկոլաևը, ինչպես նաև կրթության, մշակույթի, հասարակական և քաղաքական ոլորտների տարբեր ներկայացուցիչներ:

Ներկաները բարձր գնահատեցին միջոցառման դերը ներկայիս սերնդի բարոյագեղագիտական դաստիարակության գործում ՝ կարևորելով նմանատիպ ձեռնարկների անհրաժեշտությունը:

Երկու դար շարունակ Գոգոլի գեղարվեստական խոսքի մեծ ուժը ռեալիստական պաթոսով ուղղորդիչ  գործոն է եղել մեր հանրության կյանքում:

Թիվ 35 դպրոցի սաները կերպավորելով գոգոլյան հերոսներին՝  բարձր կատարողականությամբ վերստեղծեցին չինովնիկական աշխարհի քաոսային դիմանկարը: ՌԴ դեսպանի օգնական Անատոլի Նիկոլաևը մրցանակներ շնորհեց կրթօջախի սաներին ՝առանձնահատուկ կարևորելով ռուսերեն լեզվաիմացությունը: Բարձր գնահատանքի արժանացավ նաև կազմակերպչական անձնակազմը՝ հանձինս ռուսաց լեզվի ուսուցչուհու և տնօրեն Ասատուր Սարյանի:

Թիվ 35 դպրոցը մեկ կարևոր էջ ևս ավելացրեց իր տարեգրությանը՝ գոգոլյան արվեստի ընդհանրացնող, կենդանի ուժով առաջնորդելով սերունդներին կյանքի լուսավոր հորիզոններ: