"ՈՒՍՈՒՄ" ՀԱՆՐԱԿՐԹԱԿԱՆ ԴՊՐՈՑ

Դպրոցը վիթխարի ուժ է, որը վճռում է ժողովուրդների և պետությունների ճակատագիրը, եթե ուզում ես ազգիդ գալիքը տեսնել լուսավոր ու պայծառ, ապա պետք է ամուր պահես աճող սերնդի միտքը, հղկես և ուղղորդես  նրան, այլապես բաց կթողնես ապագան: Զուր չէ ասված՝ "Երկրի ապագան դպրոցի ձեռքում է":

Մեր երկրում շուրջ 15 տարի այս գիտակցմամբ է ուղղորդվում նաև հանրակրթության ոլորտի առաջավոր կրթօջախներից "Ուսում" հանրակրթական դպրոցը: Իր որդեգրած գաղափարների հիմքում կրթօջախն ամրագրել է  նպատակներ, որոնք ազգային դպրոցի հենասյուներն են կազմում` համակողմանիորեն զարգացած, հայրենասիրության, պետականության և մարդասիրության ոգով դաստիարակված, մասնագիտական կողմնորոշում ունեցող անձի ձևավորումը, այսինքն` ապագայի առողջ արմատների կերտումը:

Հայ ժողովրդի դարավոր երթին կրթությունն ու հոգևոր հավատը գոյապայքարի հաղթաթուղթ են դարձել մեր ազգի  կյանքում: Հետևաբար,  այսօր էլ մեր հանրապետությունը հռչակում և երաշխավորում է կրթության բնագավառի առաջանցիկ զարգացումը` որպես պետականության ամրապնդման, հայ ինքնության պահպանման կարևոր երաշխիք :

Այս նպատակով մեր հանրակրթական դպրոցները լուրջ առաքելություն ունեն: ՈՒստի՝ ունկնդիր լինելով դարերի ձայնին, հանրակրթության ոլորտի ներկայանալի կրթօջախներից "Ուսում" հանրակրթական դպրոցը յուրօրինակ կամուրջ դարձավ անցյալի և ներկայի ուսանելի արժեքների միջև: Գնահատելով անցյալի դասերը`  իմացության ազնիվ մշակը սաների հոգում պահ տվեց ազգասիրական բարեբեր հունդեր, որոնք այսօր իրենց պտուղներն են տալիս, ապացույցը` շրջանավարտների գրանցած հաջողություններն են՝ կրթարանի վաստակած բարձր հեղինակության արժանի գրավականը:

Իր աշխատանքային գործունեությունը կազմակերպելիս՝  "Ուսում" հանրակրթական դպրոցը ամրագրեց սկզբունքներ, որոնք ուղենշային դարձան դպրանոցի կյանքում. Այն է հոգևոր-մշակութային բարձր արժեքների տարածում, ռազմահայրենասիրական դաստիարակության պատշաճ կազմակերպում, ուսման բարձր որակի ապահովում, ինչպես նաև մարդկային լավագույն հատկանիշների սերմանում: Այս նպատակային գաղափարների իրագործումը վերածվեց նվիրյալ առաքելության, որին ձեռնամուխ եղավ <<Ուսում>> հանրակրթական  դպրոցի մանկավարժական անձնակազմը տնօրեն Սուսաննա Թամարյանի  գլխավորությամբ:

Կրթօջախում յուրաքանչյուր երեխայի ցուցաբերվում է անհատական մոտեցում: Առաջին իսկ հայացքից այն  ջերմ և հյուրընկալ տուն է հիշեցնում, որտեղ յուրաքանչյուր մանուկ կարողանում է լիարժեք դրսևորվել և զարգացնել բնատուր կարողությունները: "ՈՒսում" հանրակրթական դպրոցում իրականացվող յուրօրինակ դասավանդման արդյունքում՝ յուրաքանչյուր երեխա առավել համակողմանի է յուրացնում մատուցվող նյութը՝ չձանձրանալով, այլ հակառակը՝ հաճույք ստանալով ուսուցման  ընթացքից:

"ՈՒսում" դպրոցի մշակած աշխատելաոճի գաղափարական հիմքում կրթության հիմնական նպատակներն են, որոնք բխում են պետության և հասարակության շահերից և միտված են հայ ժողովրդի և մարդկության հոգևոր ժառանգությունը, գիտելիքներն ու փորձը յուրացնելուն, պահպանելուն, հարստացնելուն և սերունդներին փոխանցելուն:

Դպրոցում դասավանդում են բարձրագույն կրթությամբ, բազմամյա աշխատանքային փորձ, մանկավարժական հմտություններ և կարողություններ ունեցող ուսուցիչներ, ովքեր տիրապետում են ուսուցման նոր մեթոդներին և հնարքներին:

Անձի համակողմանի և ներդաշնակ զարգացման գործում կրթօջախը առանձնակի կարևորում և պատշաճ կերպով իրականացնում է տարաբնույթ միջոցառումներ՝ հոգևոր-մշակութային, ռազմահայրենասիրական, ազգային-ավանդական, ուսումնամարզական,  գեղագիտական և այլ թեմաներով:

Կրթօջախում իրականացվող բազմաբովանդակ աշխատանքների ինքնատիպ ստուգատեսն է տարեվերջյան ամփոփիչ միջոցառումը, որը յուրօրինակ համագումարի է բերում կատարված աշխատանքները` ուղիներ նախանշելով ապագայի ծրագրերի և անելիքների համար: Հերթական միջոցառմանը ներկա էր նաև "Դպրություն" հաղորդաշարի ստեղծագործական անձնակազմը: Հետևելով իրականացված տարաբնույթ և մեծածավալ միջոցառումներին, պարզապես հիացմունք և հպարտություն ապրեցինք, որ մեր երկրի հանրակրթության ոլորտում առկա են այսօրինակ ուսումնական հաստատություններ: Կրթօջախի ձեռքբերումները ակներև էին ինչպես գիտելիքի մրցության, այնպես էլ գեղարվեստի, ուսումնարամարզական, ազգամշակութային տարբեր ձեռնարկներում դրսևորած փայլուն արդյունքներում: Միջոցառման ժամանակ դիպլոմներ հանձնվեցին առարկայական օլիմպիադային արժանվույնս դրսևորված աշակերտներին: Խրախուսական շնորհակալագրերի արժանացան նաև "Վարք մեծաց" շարքի, ժողովրդական ասացվածքների և առածների, ազգային տոների, ավանդույթների, հայ երգարվեստի հայտնի կոմպոզիտորների և այլ թեմաներով միջոցառումների մասնակիցները: Կրթօջախի  մշակութային կյանքում հատկապես ուշագրավ են ազգային-հոգևոր արժեքների տարածմանն ուղղված ձեռնարկները, ինտելեկտուալ խաղ մրցույթները, ուսուցողական բաց դասերն ու ակտիվ քննարկումները, որոնց մասնակիցները ևս արժանացան պատվոգրերի: <<ՈՒսում>> հանրակրթական դպրոցի տարեվերջյան ամփոփիչ միջոցառումն ուղեկցվեց տարվա ընթացքում իրականացված բազմաբնույթ միջոցառումների առանձին դրվագների ցուցադրմամբ և գեղարվեստական կատարումներով:   

"Ուսում" հանրակրթական դպրոցում հատկապես առաջնային հարթության վրա է ուսումնամարզական կյանքը: Այս առումով ուշագրավ են կրթօջախում իրականցվող շաշկու դասընթացները, որոնց հաջող արդյունքների ինքնատիպ ստուգատեսն է արդեն երրորդ տարին անընդմեջ կազմակերպվող ռուսական շաշկու պատանիների և աղջիկների մրցույթի Երևանի առաջնությունը: Այն անցկացվում է "ՈՒսում" հանրակրթական դպրոցում՝ տնօրինության անմիջական աջակցությամբ: Պատահական չէ, որ Հայաստանում շաշկու զարգացմանը և տարածմանը նպաստելու  համար դպրոցի տնօրեն Ս. Թամարյանը պարգևատրվել է շաշկու միջազգային ասոցիացիայի և քաղաքապետարանի շնորհակալագրերով:

Յուրաքանչյուր աշխատանքի հաջողության հիմքում նվիրումն է,  սերն ու նպատակասլաց  գործելաոճը: Այդ աշխատանքի արդյունքում է նպատակը վերածվում գործի,  արարումը դառնում  կենսաձև, ժամանակը` սահման` ծրագրերը կյանքի կոչելուև զարգացման նոր հեռանկարներ մշակելու համար:

"Ուսում" հանրակրթական դպրոցի առաջընթացի հիմքում բազմավաստակ մանկավարժների նվիրումն է: Այսօր տարիների հեռավորությունից առավել տեսանելի են կրթօջախի ձեռքբերումները` ինչպես ուսումնագիտական, այնպես էլ կրթամշակութային ամենատարբեր ոլորտներում: Հայտարարի բերելով տարիների վաստակն ու ապագայի անելիքները` "Ուսում" հանրակրթական դպրոցը  շարունակում է համալրել իր կենսապատումը՝  ստեղծագործական անսպառ մղումներով և կատարելագործման հաստատուն քայլերով:

Ստեղծագործական խումբ Creative Group
Արթուր Դանիելյան Arthur Danielyan
Հեղինե Կարապետյան Heghine Karapetyan
Նարինե Ադամյան Narine Adamyan
TVADSTUDIO ©